எனைக் கொல் கண்ணம்மா

எனக்கான என் தேவதையே

எதைக் கொண்டு வந்தாய்

எனைக் கொன்று செல்ல

கொண்டு செல்ல

உன் அழகான இதழ்களின்

ஓரப் புன்னகையையா ?

உன் சுருண்டு நீளும் கூந்தலின்

மர்ம வாசத்தையா ?

உன் மூச்சுக் காற்றின்

மூர்க்க காதலையா ?

உன் விம்மித் தவிக்கும்

விடை தெரியா சோகத்தையா ?

உன் பதுங்கித் தாக்கும்

பருவத் தேகத்தையா ?

வருடித் தீர்க்கும் - உன்

வசிய விரல்களையா ?

இதனை இதனால்

என்றெல்லாம் பேசித் துணிந்து

போயும்போயும்

எனைக் கொன்று செல்லவா

இத்தனை போர்த் தந்திரமும் ?

முதல் பார்வையிலேயே

உன் எண்ணத்தை

என் மீது

வீசி எறிந்திருக்கலாமே...

முழு மனதோடு - உன்

காலடியில்

மூர்ச்சையடைந்திருப்பேனே.....

இருக்கட்டும் ...

உன் உலகில்

நானும் ஒரு

தேவதையாகி - உனைச்

சுற்றி வருவேன்...

அப்போதாவது - உன்

பாசாங்கு மனதில்

ஒளிந்திருக்கும்

எனக்கான காதலை

ஒரே ஒரு துளி

கண்ணீராய்

காட்டி விட்டுப் போ...